From The Matebele Valleys

About the Book

Abadala bathi isizwe yisizwe ngamasiko aso. Kube kanti njalo isizwe yisizwe ngamaKhosi aso langamaqhawe aso kanye langembali yaso. Kusenjalo ngesizwe samaNdebele akweleZimbabwe. Ekadeni  kusadliwa ngoludala bekuhlatshelwa ingoma ezifana lale ethi;

‘Kudala kwakungenje,

Kwakubusa uMambo loMzilikazi,’

Kube kanti ngempi yenkululeko eyokusunduza abancindezeli babamhlophe abaseRhodesia uMthwakazi ubecula ethi;

‘Lizwe ngobani na?

Sizwe ngoNkomo….’

Kuthi kusenjalo ngemva kukazibuse oka1980 isizwe sikaMthwakazi sehlelwa yisiga esibi eseKhukhula. Abanengi bafa. Abanengi bacatsha. Sekuze kulalamumhlanje singazi lapho bakhothamela khona. Bamane badliwa zinyoni zasendle lamakhanka emahlathini. Indaba le isegudwini ebantwini bakaMthwakazi ngalesi sigameko.

UMthembo wethulela isizwe izibongo lezinkondlo  ngamakhosi lamaqhawe esizwe sikaMthwakazi langeziphithiphithi zeKhukhula ezama1980's. Ezinye ngezigoqela okutshiyeneyo ngempilo jikelele.

 IsiNdebele esiqotho sithi ukuzwa yikuncitshwa sibuye futhi sithi imbila yaswela umsila ngokulayezela.

Ilanga laphuma lendaba latshona lendaba. Woz’ ungene!

About the Author

Ugwalo lolu lilethulelwa yimbongi yakoMthembo ozithembayo uMnumnzana Thembani Sibhalwa Dube. Lolu lugwalo lwakhe lwezinkondlo olwakuqala uMnu. Thembani Sibhalwa Dube. Kusenjalo nje uMnu. Dube uke waloba inkondlo elobela amalunga e-Budding Writers Association of Zmbabwe, egwalweni oluthi uMthombo WesiZwe lapho ethula inkondlo ethi: Koze Kubenini?  U-Koze Kubenini yaba yinkondlo eyavusa uMthembo ugqozi lokuloba izinkondlo kuze kube lalamhlanje.

UMthembo ukhulele phakathi kwezimpi ezimbili. Ngama1970's wabona impi yenkululeko eyabafana beZipra esigabeni seNkayi kwelikaMzilikazi eZimbabwe. Kwathi ngemva kokuthola uzibuse ngo1980 wabona iziphithiphithi zeKhukhula lapho afelwa yizihlobo zakhe kwathi kusenjalo kwafa abantu abanengi njalo abanye bahlukuluzwa ngochuku olukhulu esigabeni seMatebeleland.

UMthembo ugqoke ibhatshi lobubalisi eleDiploma in Education alithola eHillside Teacher's College koBulawayo lapho enza izifundo zesiNdebele/Zulu kweleZimbabwe. UMthembo watshiya ezobubalisi walubhekisa eUK lapho enza ezempilakahle eUniversity of Southampton lapho athola i-Advanced Diploma in Nursing. Okwamanje uMthembo useLondon lapho enza izifundo zeMSc Health Studies kwi-Kings College University yeLondon njalo esebenza kwezempilakahle e-UK